|
Talent / Verarbung? Seker speelt dar´n Barg van d´Öllernsiet mit rin, in mien Talent to´t Schauspeelern. Man ik meen jümmers, dat hett mi de Herrgott mitgeben. Dat steiht ja ok al in de Bibel, „Ji schölt mit jo Talent wuchern!“ oder so liek. Man wat mien Ahnen anlangt hebbt de seker ok ehr´n Deel tostüürt. Vadders Vadding (seggt´n in Meckelborg) ton Bispill, hett Scheper lehrt. Van den heff ik wiß dat Sinnieren un den Humor. He weer´n ganz plietschen. Szü, un de „Dichter“, dat weer mien Vadder (He is twoors van Profeschoon Putzbüdel wesen.) Van den heff ik dat Riemeln arft. Grootmudder, dat weer de Süster van mien richtige Grootmudder, de mi meist behött hett, harr jümmers ´n „Leed up de Lippen,“ seggd´n woll. Denn Singen kunn ik ok good. Nu kummt mien Mudder, van de heff ik den rechten Schisslaweng för d` richtige Betonung mitkreegen. Se kunn wunnerbar Gedichten un Leeder upseggen un singen. Mi klingt vandagen noch dat Leed „De Musik kummt“ in't Ohr. 'To bidragen hefft ok seker de Filmschauspeelers de ik in't Kintopp sehn heff. Ok bi de Frontbühn heff ik mi biwegelang wat afkeken. Szü, so is ut mi so´n lütten Kummediant wurrn. |
